Content feed Comments Feed
    “சுதந்திரமென்பது மனிதனின் ஆத்மார்த்மான தவிர்க்க முடியாத ஒரு தேவை, அது எட்டப்படும் வரை மனிதனின் ஒவ்வொரு துளி இரத்தத்திலும் அதற்கான வேட்கை செறிந்து கிடக்கும்”

‘சமூகத்திற்கு பலம் சேர்க்க வேண்டிய ஆறு மாணவர்களின் இழப்பும் ஜீரணிக்க முடியாததாகும். இனியும் இவ்வாறான பேரவலம் தொடரக்கூடாது’ என்று வடக்கு மாகாண கல்வி அமைச்சர் கலாநிதி க.சர்வேஸ்வரன் தெரிவித்துள்ளார்.

யாழ்ப்பாணம் மண்டைதீவுக் கடலில் நேற்று திங்கட்கிழமை நிகழ்ந்த படகு விபத்தில் பலியான மாணவர்களுக்கு அஞ்சலி தெரிவித்து வெளியிட்டுள்ள ஊடகக் குறிப்பிலேயே அவர் மேற்கண்டவாறு குறிப்பிட்டுள்ளார்.

அதில் மேலும் கூறப்பட்டுள்ளதாவது, “தற்சமயம் க.பொ.த. உயர்தரப் பரீட்சை எழுதிக் கொண்டிருக்கும் ஆறு மாணவர்கள் நேற்று (திங்கட்கிழமை) மாலை மண்டைதீவு கடலில் மூழ்கி பரிதாபமாக மரணித்த பேரவலச் செய்தி அதிர்ச்சியையும் மிகுந்த மன வேதனை யையும் அளிக்கின்றது. அதிகரித்துவரும் வீதி விபத்துக்கள், புகையிரதக் கடவை விபத்துககளைத் தடுப்பதற்கான அல்லது குறைப்பதற்கான முயற்சியில் நாம் ஈடுபட்டுக கொண்டிருக்கும் வேளையில், பாதுகாப்பற்ற படகுப் பயணத்தின் மூலம், ஆறு மாணவர்களை நாம் இழந்தது என்பது, மேலும் வேதனையைத் தருகின்ற சம்பவமாகும்.

எமது சமுதாயம் பொதுவாக மக்கள் தொகையிலும் குறிப்பாக ஆண்களின் தொகையிலும் வீழ்ச்சி அடைந்து கொண்டுவரும் வேளையில் கல்வித் தரத்தை மேம்படுத்தி எமது பலத்தை அதிகரிக்க வேண்டிய நிலையில் நாம் உள்ளோம். அதனை நோக்கியே எமது திட்டங்களும் செயற்பாடுகளும் முன்னெடுக்கப்பட்டு வருகின்றன. இவ்வேளையில் கல்வியில் உயர்தரத்தில் உள்ள ஒரு சமூகத்திற்குப் பலம் சேர்க்க வேண்டிய இந்த ஆறு மாணவர்களின் இழப்பும் ஜீரணிக்க முடியாததாகும்.

இவ்விழப்புக்கள் அவர்கள் சார்ந்த குடும்பங்களுக்கு மட்டுமின்றி தமிழ் சமூகத்திற்கும் பேரிழப்பாகும். இளைஞர்கள் மத்தியில் அதிகரித்து வரும் அலட்சிய மனோபாவமும் இவ்வாறான இழப்புக்களுக்கு ஒரு காரணமாகும். எதிர் காலத்தில் இத்தகைய இழப்புக்கள் எதுவும் நடைபெறாவண்ணம் பெற்றோர், பொறுப்புணர்வுடனும், எச்சரிக்கையுடனும் வழிகாட்டி வளர்க்கவேண்டும் என்ற பணிவான வேண்டுகோளை இவ்வேளையில் விடுப்பதுடன் பாதுகாப்பற்ற இத்தகைய கேளிக்கை நிகழ்வுகளில் எவரும் ஈடுபட வேண்டாம் என்றும் இளைஞர்களைத் தயவுடன் கேட்டுக் கொள்கின்றேன்.

தமது பிள்ளைகளின் இன்னுயிர்களை இழந்து வாடும் பெற்றோர்கள் மற்றும் குடும்பத்தினருக்கும், நல்ல மாணவர்களை, நண்பர்களை இழந்து வாடும் பாடசாலைச் சமூகத்திற்கும் எனது ஆழ்ந்த அனுதாபங்களைத் தெரிவித்துக் கொள்கின்றேன். இவைபோன்ற துயரமான சம்பவங்கள் இனிமேலும் நிகழாதிருக்க விழிப்புறுக என மாணவர்கள் இளைஞர்களை மீண்டும் வினயமாக வேண்டிக் கொள்கின்றேன்.

ஆறு இளைஞர்களினதும் ஆத்மா சாந்தியடையப் பிரார்த்திக்கின்றேன்.” என்றுள்ளார்.

0 Responses to சமூகத்திற்கு பலம் சேர்க்க வேண்டிய ஆறு மாணவர்களின் இழப்பும் ஜீரணிக்க முடியாதது: கலாநிதி க.சர்வேஸ்வரன்

Post a Comment

Followers

உலகப்பரப்பில் நடைபெறும் மாவீரர் நாள் விபரங்களை கீழ் உள்ள படத்தில் அழுத்தி காணலாம்.