Content feed Comments Feed
    “சுதந்திரமென்பது மனிதனின் ஆத்மார்த்மான தவிர்க்க முடியாத ஒரு தேவை, அது எட்டப்படும் வரை மனிதனின் ஒவ்வொரு துளி இரத்தத்திலும் அதற்கான வேட்கை செறிந்து கிடக்கும்”

கடந்த காலத்தில் இலங்கை இராணுவத்தின் புலனாய்வுப் பிரிவுடன் தான் நெருக்கமாக செயற்பட்டதாக பொது பல சேனா அமைப்பின் செயலாளர் கலகொட அத்தே ஞானசார தேரர் மேல்முறையிட்டு நீதிமன்றத்தில் சாட்சியமளித்தபோது தெரிவித்துள்ளார்.

நீதிமன்றத்தை அவமதித்ததாக குற்றஞ்சாட்டி ஞானசார தேரருக்கு எதிராக தாக்கல் செய்யப்பட வழக்கொன்று கடந்த வியாழக்கிழமை விசாரணைக்கு வந்தபோது, அளித்த சாட்சியத்தில் அவர் இவ்வாறு கூறியுள்ளளார்.

கடந்த 2016ஆம் ஆண்டு 25ஆம் திகதி ஊடகவியலாளர் பிரகீத் எக்னளிகோடா காணாமற்போனது தொடர்பான வழக்கு விசாரணைக்கு வந்தபோது, நீதிமன்றத்தை அவமதிக்கும் வகையில் நடந்து கொண்டதாக குற்றஞ்சாட்டி அப்போதைய ஹோமாகம நீதிவானாக கடமையாற்றிய ரங்க திசாநாயக்க ஞானசார தேரருக்கு எதிராக இந்த வழக்கை தாக்கல் செய்துள்ளார்.

இந்த வழக்கு வியாழனன்று விசாரணைக்கு வந்தபோது சாட்சியமளித்த ஞானசார தேரர் யுத்தம் நடைபெற்றபோதும், யுத்தம் முடிவடைந்த பின்னரும் தான் இலங்கை இராணுவத்தின் புலனாய்வுப் பிரிவுடன் நெருக்கமாக செயல்பட்டு வந்ததாக தெரிவித்துள்ளார்.

இராணுவப் புலனாய்வுப் பிரிவின் சில அதிகாரிகளுக்கு தனிப்பட்ட ரீதியில் தான் உதவியுள்ளதாக கூறிய அவர், பிரிவினைவாதிகளிடமிருந்து நாட்டைக் காப்பதற்காக அவர் இராணுவப் புலனாய்வு பிரிவினருக்கு ஆதரவு அளித்து வந்ததாகவும் குறிப்பிட்டுள்ளார்.

ஊடகவியலாளர் பிரகீத் எக்னளிகோடா காணாமற்போனது தொடர்ப்பாக தற்போதைய அரசாங்கம் ஆட்சிக்கு வந்த பின்னர், சில முக்கிய இராணுவ புலனாய்வு துறை அதிகாரிகளை பொலிஸார் கைது செய்ததாக குற்றஞ்சாட்டிய ஞானசார தேரர், தற்போதைய அரசாங்கத்திலுள்ள சிலர் இராணுவ புலனாய்வுப் பிரிவு அதிகாரிகளின் செயல்பாடுகளை முடக்க முயற்சிப்பதாக குற்றஞ்சாட்டினார்.

மேலதிக வழக்கு விசாரணை அடுத்த மாதம் முன்றாம் தேதிக்கு ஒத்திவைக்கப்பட்டுள்ளது.

முன்னாள் இலங்கை ஜனாதிபதி மஹிந்த ராஜபக்ஷவின் ஆட்சிக்காலத்தில் கத்தோலிக்க மற்றும் இஸ்லாமிய மத வழிபாட்டு தளங்கள் மீது தாக்குதல் மேற்கொள்ளப்பட்டது தொடர்பாக பொது பல சேனா அமைப்பு மீது குற்றச்சாட்டு சுமத்தப்பட்டதுடன், அந்த அமைப்புக்கு இலங்கை இராணுவத்தின் புலனாய்வுப் பிரிவின் ஆதரவு கிடைத்து வருவதாக அப்போது ஊடகங்கள் மற்றும் சில அரசியல்வாதிகள் குற்றச்சாட்டுக்களை சுமத்தியிருந்தனர். இந்தப் பின்னணியில் ஞானசார தேரர் இந்த கருத்துக்களை வெளியிட்டுள்ளது குறிப்பிடத்தக்கது.

(பிபிசி)

0 Responses to இலங்கை இராணுவத்தின் புலனாய்வுப் பிரிவுடன் நெருக்கமாக செயற்பட்டேன்: ஞானசார தேரர்

Post a Comment

Followers