Content feed Comments Feed
    “சுதந்திரமென்பது மனிதனின் ஆத்மார்த்மான தவிர்க்க முடியாத ஒரு தேவை, அது எட்டப்படும் வரை மனிதனின் ஒவ்வொரு துளி இரத்தத்திலும் அதற்கான வேட்கை செறிந்து கிடக்கும்”

நாட்டின் பிரதான எதிர்க்கட்சி என்கிற அந்தஸ்தைப் பெற்றுக் கொண்ட தமிழ்த் தேசியக் கூட்டமைப்பு இதுவரை சாதித்தது என்ன?, என்று தமிழர் விடுதலைக் கூட்டணியின் செயலாளர் நாயகம் வீ.ஆனந்தசங்கரி கேள்வி எழுப்பியுள்ளார்.

“கூட்டமைப்பினர் இதுவரை அரசியல் கைதிகள் விடயத்தில் என்ன முன்னேற்றத்தைக் கண்டார்கள்? வலிந்து காணாமல் ஆக்கப்பட்டவர்களின் போராட்டம் ஒரு தொடர்கதையாகிக் கொண்டிருக்கின்றது. அதைப்பற்றி சம்மந்தப்பட்டவர்களிடம் பேச்சுவார்த்தை நடத்தி ஒரு தீர்வைப் பெற்றுக் கொடுக்க முடியாமல் இருப்பதன் மர்மம் என்ன? போரால் பாதிக்கப்பட்டவர்களும், புனர்வாழ்வு அளிக்கப்பட்ட போராளிகளும் வறுமையில் வாடுகின்றார்கள். அவர்களுக்கான திட்டங்கள் எதையாவது வைத்துள்ளார்களா?” என்றும் அவர் வினாவியுள்ளார்.

ஊடகங்களுக்கு நேற்று புதன்கிழமை அனுப்பிவைத்துள்ள ஊடக அறிக்கையிலேயே வீ.ஆனந்தசங்கரி மேற்கண்டவாறு தெரிவித்துள்ளார்.

அந்த அறிக்கையிலும் மேலும் குறிப்பிடப்பட்டுள்ளதாவது, “வெறுமனே தங்களால்தான் இந்த அரசாங்கம் அமைந்தது என்று தம்பட்டம் அடித்துக் கொண்டு, பேரம் பேசி அரசியல் செய்யத் தெரியாமல் சோரம் போய்விட்டார்கள் என்று மக்கள் தலையில் அடித்துக் கதறுவது தமிழ்த் தேசியக் கூட்டமைப்பு தலைவர்களின் காதுகளில் கேட்கவில்லையா? தமிழரசுக் கட்சியின் சர்வாதிகாரப் பிடிக்குள் சிக்கிக் கொண்ட பங்காளிக் கட்சிகள் என்ன செய்வது என்று தெரியாமல் தவிக்கும் நிலை ஏற்பட்டுள்ளது. முள்ளிவாய்க்காலில் நடந்த படுகொலையை ஏன் வேடிக்கை பார்த்தார்கள்?

யுத்தம் பற்றிப் பேசுவதற்கு இந்திய அரசு அழைத்தபோது, எதற்காகத் தட்டிக் கழித்தார்கள்? யுத்த நிறுத்தம் ஏற்பட்டால் தங்களின் பதவிக் கனவுகள் தவிடுபொடியாகிவிடும் என்பதால், மக்கள் அழிந்தாலும் சரி, விடுதலைப் புலிகள் வீழ்ந்தாலும் சரி, வாய்திறக்கக் கூடாது என மௌனவிரதம் இருந்தவர்களிடமே மீண்டும் மக்கள் நம்பிக்கை வைத்ததன் விளைவு, இன்று அவர்களுக்குச் சாதகமாகிவிட்டது. மௌனமாக இருந்தால்தான் மக்கள் மீண்டும் தமக்கு வாக்களிப்பார்கள் என்ற எண்ணம் அவர்களுக்கு வந்து விட்டது. எனவேதான் மௌனமாக இருந்து சொகுசு வாழ்க்கை வாழ்கின்றார்கள். இனியும் மக்கள் பொறுத்துக்கொள்ள மாட்டார்கள் என்பதை அவர்களுக்கு உணர்த்தும் காலம் வந்து விட்டது. சகலரும் ஒன்றிணைந்து சர்வாதிகார தமிழரசுக் கட்சித் தலைவர்களுக்கு ஒரு பாடம் புகட்டவேண்டிய தருணம் வந்து விட்டது.” என்றுள்ளது.

0 Responses to கூட்டமைப்பு எதிர்க்கட்சியாக இருந்து எதனைச் சாதித்தது: வீ.ஆனந்தசங்கரி

Post a Comment

Followers

உலகப்பரப்பில் நடைபெறும் மாவீரர் நாள் விபரங்களை கீழ் உள்ள படத்தில் அழுத்தி காணலாம்.