Content feed Comments Feed
    “சுதந்திரமென்பது மனிதனின் ஆத்மார்த்மான தவிர்க்க முடியாத ஒரு தேவை, அது எட்டப்படும் வரை மனிதனின் ஒவ்வொரு துளி இரத்தத்திலும் அதற்கான வேட்கை செறிந்து கிடக்கும்”

யாழ்ப்பாணம் மேல் நீதிமன்ற நீதிபதி மாணிக்கவாசர் இளஞ்செழியனை இலக்கு வைத்து நடத்தப்பட்டதாக கூறப்படும் துப்பாக்கிப் பிரயோக தாக்குதலுக்கு எதிர்ப்பு வெளியிட்டு யாழ்ப்பாணம் உள்ளிட்ட வடக்கு மாகாணத்தின் பல பகுதிகளிலும் கடையடைப்பு, பணிப்புறக்கணிப்பு போராட்டங்கள் முன்னெடுக்கப்படுகின்றன.

இன்று திங்கட்கிழமை தமது பணிகளை வடக்கு மாகாண சட்டத்தரணிகள் புறக்கணித்துள்ள நிலையில், போக்குவரத்துத்துறையினரும் மட்டுப்படுத்தப்பட்ட சேவையையே முன்னெடுத்துள்ளனர். வணிக நிறுவனங்களும் அதிகளவில் மூடப்பட்டுள்ளன.

அத்தோடு, யாழ். மாவட்டச் செயலக ஊழியர்கள் உள்ளிட்ட அரச ஊழியர்கள் கவனயீர்ப்புப் போராட்டத்திலும் ஈடுபட்டனர்.

“நாம் ஆட்சி மாற்றத்துக்கு ஒத்துழைத்து, புதிய ஆட்சியை கொண்டு வந்த பொழுது எங்களுடைய பிரச்சினைகளுக்கு தீர்வு கிடைக்கும் என்றே நம்பியிருந்தோம்.” என்று தமிழ்த் தேசியக் கூட்டமைப்பின் செயலாளரும் பாராளுமன்ற உறுப்பினருமான மாவை சேனாதிராஜா தெரிவித்துள்ளார்.

வவுனியாவில் நேற்று முன்தினம் சனிக்கிழமை இடம்பெற்ற நிகழ்வொன்றில் கலந்து கொண்டு உரையாற்றும்போதே அவர் இவ்வாறு கூறியுள்ளார்.

அவர் மேலும் தெரிவித்துள்ளதாவது, “இராணுவத்தினரிடம் கையளிக்கப்பட்டவர்கள் மற்றும் சரணடைந்தவர்களைத்தான் தமிழ் மக்கள் கேட்கின்றார்கள். அதற்கு இந்த அரசாங்கம் பதில் சொல்லியே ஆக வேண்டும்.

இராணுவத்தினர் இழைத்த பல குற்றங்களுக்கு பதில் சொல்லுவதற்கு தயக்கம் காட்டினாலும், ஐக்கிய நாடுகள் மனித உரிமை பேரவையின் தீர்மானத்தின் அடிப்படையில் காணாமல் ஆக்கப்பட்டவர்கள் குறித்து விசாரணை நடத்தக் கூடிய ஒரு அலுவலகத்தை அமைக்கும் சட்ட மூலத்தில் ஜனாதிபதி கையெழுத்திட்டுள்ளார்.

ஆனாலும், இந்த அரசாங்கம் எடுக்கின்ற நடவடிக்கைகள் காணாமல் ஆக்கப்பட்டவர்களுக்கு விசாரணை நடத்தி நீதியை வழங்க வேண்டும் என்ற அடிப்படையில் அந்த அலுவலகம் திறக்கப்படும் பட்சத்தில், தமிழ் மக்களுக்கு தீர்வு வழங்கக்கூடியதாகவும் இருக்க வேண்டும் என நாங்கள் வலியுறுத்துகின்றோம்.” என்றுள்ளார்.

மட்டக்களப்பு கரடியனாறு பகுதியில் விசேட அதிரடிப்படையினர் மேற்கொண்ட துப்பாக்கிப் பிரயோகத்திலிருந்து தப்பிக்க முயன்ற இளைஞர் ஒருவர் நீரில் மூழ்கி உயிரிழந்துள்ளார்.

கரடியனாறு பொலிஸ் பிரிவுக்குட்பட்ட முந்தன்குமாரவெளி ஆற்றில் இன்று திங்கட்கிழமை சட்டவிரோதமாக ஆற்றுமணல் ஏற்றியவர்கள் மீதே குறித்த துப்பாக்கிச் சூடு மேற்கொள்ளப்பட்டுள்ளது. இதன்போது, தப்பிப்பதற்காக ஆற்றில் குதித்தவர்களில் இளைஞர் ஒருவரே நீரில் மூழ்கி உயிரிழந்துள்ளார்.

குறித்த சம்பவத்தில் படுகாயமடைந்த மற்றுமொருவர் செங்கலடிப் பிரதேச வைத்தியசாலையில் அனுமதிக்கப்பட்டுள்ளார்.

இலங்கையில் கடந்த காலங்களில் இடம்பெற்ற குற்றச் செயல்களுக்கு பொறுப்புக் கூற வேண்டிய தேவையிருக்கின்றது. அதனை, இலங்கை அரசாங்கம் செய்ய வேண்டும் என்று கனேடிய பிரதமர் ஜஸ்டின் ரூடோ தெரிவித்துள்ளார். கறுப்பு ஜூலை கலவர நினைவு தினத்தை முன்னிட்டு அவர் இவ்வாறு கருத்து வெளியிட்டுள்ளார்.

இலங்கயைில் நிரந்தர சமாதானத்தை ஏற்படுத்துவதற்கு முன்னெடுக்கப்பட்டு வரும் முயற்சிகள் வரவேற்கப்பட வேண்டியவை என குறிப்பிட்டுள்ள கனேடிய பிரதமர், எனினும், குற்றச் செயல்களுக்கு பொறுப்பு கூறுதலின் ஊடாகவே நம்பிக்கையை கட்டியெழுப்ப முடியும் என்றும் குறிப்பிட்டுள்ளார்.

கொழும்பு உள்ளிட்ட இலங்கையின் பல பகுதிகளிலும் அரச படையின் ஒத்துழைப்போடு 1983ஆம் ஆண்டு ஜூலை மாதம் 24ஆம் திகதி முதல் 29ஆம் திகதி வரையில் ஏற்பட்ட கலவரத்தில் பெரும் எண்ணிக்கையிலான தமிழ் மக்கள் கொல்லப்பட்டடார்கள்.

யாழ்ப்பாணம் மேல் நீதிமன்ற நீதிபதி மாணிக்கவாசர் இளஞ்செழியனை இலக்கு வைத்து நடத்தப்பட்டதாகக் கூறப்படும் துப்பாக்கிப் பிரயோகத் தாக்குதல் தொடர்பில் உரிய நடவடிக்கை எடுக்குமாறு வடக்கு மாகாண உப பொலிஸ் மா அதிபருக்கு பணித்துள்ளதாக வடக்கு மாகாண முதலமைச்சர் விக்னேஸ்வரன் தெரிவித்துள்ளார்.

அவர் வெளியிட்டுள்ள ஊடக அறிக்கையில் தெரிவிக்கப்பட்டுள்ளதாவது, “கடந்தசனிக்கிழமை நல்லூரில் நடைபெற்ற தாக்குதலின் போது உயிர் நீத்தபொலிஸ் சாஜன்ட் சரத் ஹேமசந்திரவின் மறைவுஎம் அனைவரையும் கவலையில் ஆழ்த்தியுள்ளது.

கடமையில் ஈடுபட்டிருந்த போது உயிர் நீத்தபொலிஸ் அலுவலரின் குடும்பத்தாருக்கு எமது ஆழ்ந்த அனுதாபங்களைத் தெரிவிக்கும் அதேநேரத்தில் வன்செயல்களில் ஈடுபட்ட இளைஞர்களின் நடவடிக்கைகளை நாம் வன்மையாகக் கண்டிக்கின்றோம்.

அருமந்த ஒருஉயிரைப் பறித்தமையால் அன்னாரின் குடும்பம் பலவித இன்னல்களுக்கும் இடர்களுக்கும் முகம் கொடுக்க வேண்டி வந்துள்ளது.

வன்முறையில் ஈடுபட்டவர்களின் உள்ளெண்ணம் பற்றித் தாம் ஆராய்ந்துவருவதாக வடமாகாண உப பொலிஸ்மாஅதிபர் தெரிவித்துள்ளார். இந்ததாக்குதல் சம்பந்தமாக உரியநடவடிக்கை எடுக்குமாறு அவருக்குப் பணித்துள்ளேன்.” என்றுள்ளது.

யாழ்ப்பாணம் மேல் நீதிமன்ற நீதிபதி மாணிக்கவாசர் இளஞ்செழியனை இலக்கு வைத்து நடத்தப்பட்டதாக கூறப்படும் துப்பாக்கிப் பிரயோக தாக்குதல் தொடர்பில் விரைவில் சட்டத்தை நடைமுறைப்படுத்தி நீதி நிலை நாட்டப்பட வேண்டும் என்று அமெரிக்கா வலியுறுத்தியுள்ளது.
இலங்கைக்கான அமெரிக்க தூதரகத்தின் உத்தியோகபூர்வ டுவிற்றர் பக்கத்தில் இவ்வாறு பதிவிடப்பட்டுள்ளது.

இந்த சம்பவம் தொடர்பில் இலங்கை அரசாங்கம் உரிய முறையில் அவதானத்தை செலுத்தி, நீதியை நிலைநாட்ட முன்வர வேண்டும் அமெரிக்கா கோரிக்கை விடுத்துள்ளது.

யாழ். மாவட்ட மேல் நீதிமன்ற நீதிபதி மாணிக்கவாசகர் இளஞ்செழியனை இலக்குவைத்து தாக்குதல் நடத்தப்படவில்லை என்று ஆரம்பகட்ட விசாரணைகளில் தெரியவந்துள்ளதாக பொலிஸ் ஊடக பேச்சாளரும் பொலிஸ் அத்தியட்சகருமான ருவன் குணசேகர தெரிவித்துள்ளார்.

நல்லூர் பிரதேசத்தில் இரண்டு பொலிஸ் அதிகாரிகளை இலக்காகக் கொண்டு நேற்றுமுன்தினம் சனிக்கிழமை மேற்கொள்ளப்பட்ட துப்பாக்கிப் பிரயோகம் எதிர்பார்க்கப்படாத ஒரு சம்பவம் என்றும் அவர் குறிப்பிட்டுள்ளார்.

பொலிஸ் தலைமையகத்தில் நேற்று ஞாயிற்றுக்கிழமை நடைபெற்ற ஊடகவியலாளர் மாநாட்டில் இந்த விடயங்களை அவர் கூறியுள்ளார்.

பொலிஸ் ஊடகப் பேச்சாளர் தெரிவித்துள்ளதாவது, “சுமார் ஒரு கிலோமீட்டர் தொலைவில் ஒரு இடத்தில் மூவர் மது பானம் அருந்தியுள்ளனர். இதன் பின்னர் முச்சக்கர வண்டிகள் நின்றுகொண்டிலுந்த இடத்திற்கு இவர்கள் வந்துள்ளனர். அங்கிருந்தவர்களுடன் இவர்கள் வாக்குவாதப்பட்டுள்ளனர். இந்த வாக்குவாதத்தினால் தான் அங்கு வாகன நெரிசல் ஏற்பட்டுள்ளது என்பதும் விசாரணைகளிலிருந்து தொயவந்துள்ளது.

தற்போது இந்தச் சம்பவம் தொடர்பில் பொலிஸார் விரிவான விசாரணைகளை மேற்கொண்டு வருகின்றனர். பொலிஸ்மா அதிபர் இதனை விசாரணை செய்வதற்காக இரண்டு குழுக்களை நியமித்துள்ளார். வடக்கு பகுதிக்குப் பொறுப்பான சிரேஷ்ட பிரதிப் பொலிஸ் மா அதிபர் ரொஷான் பெர்னாண்டோவின் தலைமையில் விசாரணைகள் இடம்பெறுகின்றன. இந்த விசாரணைக்கான அறிக்கை நாளை கையளிக்கப்படும். மேல் நீதிமன்ற நீதிபதி இந்த சந்தர்ப்பத்தின் போது நல்லூர் பிரதேசத்தை நோக்கி சென்றுள்ளார்.

நீதிபதியின் பாதுகாப்பிற்காக பொலிஸ் அதிகாரி ஒருவர் மோட்டார் சைக்கிளில் முன்னோக்கி பயணித்தார். மற்றுமொரு அதிகாரி நீதிபதி பயணித்த வாகனத்தில் இருந்துள்ளார். நல்லூர் பிரதேசத்தில் ஏற்பட்ட வாகன நெரிசல் காரணமாக மோட்டார் சைக்கிளில் பயணித்த பொலிஸ் கான்ஸ்டபிள் வாகனத்தில் இருந்து இறங்கி நீதிபதியின் வாகனத்திற்கு தடை ஏற்படாது முன்னோக்கிச் செல்ல வழி வகை செய்துள்ளார். இந்த சம்பவத்தில் தொடர்புபட்ட முக்கிய சந்தேக நபர் அவ்விடத்திற்கு வருகை தந்து பொலிசாரின் கைத்துப்பாக்கியைப் பறித்து அந்த பொலிஸ் அதிகாரி மீது துப்பாக்கிப் பிரயோகம் மேற்கொண்டுள்ளார். இந்த சந்தர்ப்பத்தில் வாகனத்தில் இருந்த பொலிஸ் அதிகாரி அங்கு வந்துள்ளார். இதன் போது அவர் மீது துப்பாக்கிப் பிரயோகம் மேற்கொள்ளப்பட்டுள்ளது. இந்தச் சந்தர்ப்பத்தில் மேல்நீதிமன்ற நீதிபதி அந்த இடத்திலிருந்து அனுப்பி வைக்கப்பட்டுள்ளார்.

பொலிஸார் இருவரும் யாழ்ப்பாணம் வைத்தியசாலையில் அனுமதிக்கப்பட்டனர். இன்று அதிகாலை வாகனத்தில் பயணித்த பொலிஸ் கான்ஸ்டபிள் சரத் பிரேமச்சந்திர உயிரிழந்துள்ளார். 51 வயதான இவர், இரண்டு பிள்ளைகளின் தந்தையாவார். இவர் சிலாபத்தைச் சேர்ந்தவர். மற்றைய பொலிஸ் உத்தியோகத்தர் சுகமடைந்து வருகிறார். இதன் போது மதுபோதையில் இருந்த மூன்று நபர்களுக்கு இடையில் பிரச்சினைகள் ஏற்பட்டன. இவர்கள் மத்தியில் முன்பு இருந்த பிரச்சினையே இதற்குக் காரணம். தற்போது கைது செய்யப்பட்டுள்ள இருவருள் ஒருவர் முக்கிய சந்தேக நபரின் சகோதரராவார். மற்றவர் இவரது உறவினர்.

முச்சக்கர வண்டியாளர்களுக்கும் சந்தேக நபர்களுக்கிடையில் நிலவிய நீண்ட நாள் குரோதமே மோதலுக்குக் காரணம் என்பது விசாரணைகளிலிருந்த தெரியவந்துள்ளது. முக்கிய சந்தேக நபரை கைது செய்வதில் பொலிஸ் குழு ஈடுபட்டுள்ளது.” என்றுள்ளார்.

அரசியல்வாதிகளுக்கு எதிராக சுவரொட்டிகளை ஒட்ட வேண்டாம் என்று தன்னுடைய ரசிகர்களை நடிகர் கமல் ஹாசன் கேட்டுக் கொண்டுள்ளார்.

சமீபகாலமாக தமிழக அரசை கடுமையாக சாடி வருகிறார் கமல் ஹாசன். அவருடைய சாடலுக்கு தமிழக அமைச்சர்கள் பலரும் எதிர் கருத்து தெரிவித்து வருகின்றனர். இதனால் தமிழக அரசை கண்டித்து சென்னையின் பல இடங்களில் கமல் ரசிகர்கள் சுவரொட்டிகளை ஒட்டியுள்ளனர். இந்தச் சுவரொட்டிகள் சமூகவலைத்தளத்திலும் பகிரப்பட்டு வருகிறது.

இதுகுறித்து கமல் தனது டிவிட்டர் பக்கத்தில் கூறியிருப்பதாவது: “தரம் தாழாதீர். வசைபாடி சுவரொட்டிகள் ஒட்டும் செலவு நற்பணிக்குப் போகட்டும். நாடு காக்கும் நற்பணிக்கு மட்டுமே நீ தேவை. இவருக்கு பதிலளிக்க நானே போதும்.” என்றுள்ளார்.

பாராளுமன்றத்தில் நேற்று ஞாயிற்றுக்கிழமை இடம்பெற்ற பிரிவுபசார விழாவில் பேசிய குடியரசுத் தலைவர் பிரணாப் முகர்ஜி, ‘‘வானவில் நினைவுகளுடன் விடை பெறுகிறேன்” என்று தெரிவித்துள்ளார்.

நாட்டின் 13வது குடியரசுத் தலைவரான பிரணாப் முகர்ஜியின் பதவிக்காலம் நாளை செவ்வாய்க்கிழமை (யூலை 25) நிறைவடைகிறது. புதிய ஜனாதிபதியாக ராம் நாத் கோவிந்த் பதவி ஏற்க உள்ளார். இதையொட்டி, பிரணாப் முகர்ஜிக்கு பாராளுமன்ற மைய மண்டபத்தில் நேற்று பிரிவுபசார விழா நடத்தப்பட்டது.

துணை ஜனாதிபதி ஹமீது அன்சாரி, பிரதமர் நரேந்திர மோடி, பாராளுமன்ற சபாநாயகர் சுமித்ரா மகாஜன், பாராளுமன்ற விவகாரங்கள் துறை மந்திரி அனந்த குமார், மத்திய மந்திரிகள், முன்னாள் பிரதமர் மன்மோகன் சிங், காங்கிரஸ் தலைவர் சோனியா காந்தி, பா.ஜனதா மூத்த தலைவர் அத்வானி உள்ளிட்டோர் கலந்துகொண்டனர்.

இந்த பிரிவுபசார விழாவில் ஜனாதிபதி பிரணாப் முகர்ஜி உருக்கமாக பேசினார். அப்போது அவர் கூறியதாவது, “நான் இந்த பாராளுமன்றத்தால்தான் உருவாக்கப்பட்டேன். இந்த பாராளுமன்றம்தான், எனது அரசியல் கண்ணோட்டம், ஆளுமையை வடிவமைத்தது.

48 ஆண்டுகளுக்கு முன்னர் இந்த புனிதமான அமைப்பின் நுழைவாயில்களில் நான் நுழைந்தபோது எனக்கு 34 வயதுதான். 1969 ஜூலை மாதம், நான் இந்த பாராளுமன்றத்துக்கு, மேற்கு வங்காள மாநிலத்தின் சார்பில் மேல்–சபை உறுப்பினராக வந்தேன். நான் முதன்முதலாக 1969ஆம் ஆண்டு, ஜூலை மாதம் 22ஆம் திகதி நடந்த கூட்டத் தொடரில்தான் முதல்முறையாக கலந்துகொண்டேன்.

அதில் இருந்து நான் 37 ஆண்டு காலம் பாராளுமன்ற மக்களவை, மேல்–சபை உறுப்பினராக பணியாற்றி உள்ளேன். இவற்றில் 5 முறை மேல்–சபை உறுப்பினராகவும், 2 முறை மக்களவை உறுப்பினராகவும் இருந்துள்ளேன்.

என் நீண்ட வாழ்க்கை பயிற்றுவிப்பையும், கற்பதையும் கொண்டது. நான் பாராளுமன்றத்தில் நுழைந்தபோது, மேல்–சபை முற்றிலும் அனுபவம் வாய்ந்த பாராளுமன்ற வாதிகளையும், சுதந்திரப்போராட்ட வீரர்களையும் கொண்டிருந்தது.
பாராளுமன்றத்தில், பி.வி.நரசிம்மராவின் விவேகம், வாஜ்பாயின் பேச்சாற்றல், டாக்டர் மன்மோகன் சிங்கின் அமைதி, அத்வானியின் முதிர்ந்த அறிவுரை, சோனியா காந்தியின் ஆர்வமுள்ள ஆதரவு என்னை மெருகேற்றின.

பாராளுமன்ற உறுப்பினர் என்ற முறையில் சந்தேகத்துக்கு இடமின்றி இந்திரா காந்தியால் வழிநடத்தப்பட்டேன். அவரது உறுதி, சிந்தனை, தெளிவான செயல்கள், உயர்ந்த ஆளுமை அவரை உயர்த்தியது.

அந்த நாட்களில், பாராளுமன்றத்தின் இரு சபைகளிலும் சமூகம் மற்றும் நிதி சட்டங்களுக்கான தெளிவான விவாதங்கள் நடைபெற்றன. பிரபலங்களின் பேச்சுகளை ஆளுங்கட்சி வரிசையில் அல்லது எதிர்க்கட்சி வரிசையில் இருந்து கேட்டிருக்கிறேன். அப்போது, நிலைத்து நிற்கும் இந்த பாராளுமன்றத்தின் ஆன்மாவை உணர்ந்தேன். விவாதத்தின் உண்மையான மதிப்பை புரிந்தேன்.

பாராளுமன்ற மக்களவையின் 543 உறுப்பினர்கள், மேல்சபையின் 245 உறுப்பினர்கள என 788 பேரின் குரலும் முக்கியம். சட்டங்களை இயற்றுவதற்கு ஒதுக்குகிற நேரம் குறைந்து வருவது துரதிர்ஷ்டவசமானது. பாராளுமன்றம் சட்டம் இயற்றுகிற பங்களிப்பை செய்ய தவறுகிறபோது அல்லது விவாதமின்றி சட்டம் இயற்றுகிறபோது, இந்த மாபெரும் தேசத்தின் மக்கள் நம்மீது வைத்த நம்பிக்கையை மீறுவதாக நான் உணர்கிறேன்.

பாராளுமன்றம் கூடாதபோது, அவசர சட்டம் இயற்றுகிற அதிகாரத்தை அரசு கொண்டுள்ளது. ஆனால் அவசர சட்டங்களை கட்டாயமான சூழ்நிலைகளில் மட்டுமே கொண்டு வர வேண்டும். பண விவகாரங்களில் அவசர சட்டம் கூடாது.

2012ஆம் ஆண்டு, ஜூலை மாதம் 22ஆம் திகதி நான் 13வது ஜனாதிபதியாக தேர்ந்தெடுக்கப்பட்டு அறிவிக்கப்பட்டபோது என் பாராளுமன்ற உறுப்பினர் பதவி முடிவுக்கு வந்தது. 37 ஆண்டு கால பாராளுமன்றப்பணி முடிந்தாலும், இந்த அமைப்புடன் நான் தொடர்பு கொண்டுள்ளேன். உண்மையை சொல்வதானால், நான் இதன் ஒருங்கிணைந்த அங்கமாக ஆனேன்.

இந்த 5 ஆண்டுகளில், அரசியல் சாசனத்தை கட்டிக்காக்க கடுமையாக முயற்சித்தேன். சொல்லாலும், செயலாலும் இதைச் செய்தேன். ஒவ்வொரு படியிலும், பிரதமர் மோடி வழங்கிய அறிவுரையிலும், ஒத்துழைப்பிலும் நான் பெரிதும் பயன் அடைந்தேன். அவர் நாட்டில் முக்கிய மாற்றங்களுக்கு வழிநடத்திச்செல்கிறார். நான் எங்கள் தொடர்பு, இனிமையான, மரியாதையான நடத்தையின் நினைவுகளை சுமந்து கொண்டு செல்வேன்.

நான் ஜனாதிபதி பதவியில் இருந்து ஓய்வு பெற்றுச்செல்கிறபோது, பாராளுமன்றத்துடனான எனது தொடர்பும் முடிவுக்கு வருகிறது. நான் இனி இந்த பாராளுமன்றத்தின் அங்கம் இல்லை. இது துயரத்தின் சாயலுடன் இருக்கும். வானவில் நினைவுகளுடன் இன்று (நேற்று) இந்த அற்புதமான கட்டிடத்தை விட்டு விடைபெற்று செல்கிறேன்.

அன்பு நண்பர்களே, மிகுந்த நன்றி உணர்வுடன், என் இதயத்தின் பிரார்த்தனையுடன் நான் உங்களிடம் இருந்து விடைபெறுகிறேன். நான் இந்த மாபெரும் தேசத்தில், ஒரு தாழ்மையான ஊழியராக மக்களுக்கு சேவையாற்றிய பரிபூரணமான உணர்வுடனும், மகிழ்ச்சியுடனும் செல்கிறேன்.” என்றுள்ளார்.

காஷ்மீர் எல்லையில் அத்துமீறினால் பாகிஸ்தானுக்கு தகுந்த பாடம் கற்பிக்கப்படும் என்று வெங்கையா நாயுடு எச்சரிக்கை விடுத்துள்ளார்.

காஷ்மீர் எல்லையில் பாகிஸ்தான் இராணுவம் கடந்த 10 நாட்களாக இந்திய இராணுவ நிலைகளையும், எல்லையோர கிராமங்களையும் குறி வைத்து தாக்குதல் நடத்தி வருகிறது.

பாகிஸ்தானின் இந்த அத்துமீறல்களுக்கு முன்னாள் மத்திய மந்திரியும், குடியரசுத் துணைத் தலைவர் வேட்பாளருமான வெங்கையா நாயுடு கடும் எச்சரிக்கை விடுத்துள்ளார்.

1999ஆம் ஆண்டு நடந்த கார்கில் போரில் உயிர் நீத்த தியாகிகளை போற்றும் விதமாக இராணுவ அணிவகுப்பு நிகழ்ச்சி டெல்லியில் நேற்று ஞாயிற்றுக்கிழமை நடைபெற்றது.

இதில் கலந்துகொண்டு பேசிய வெங்கையா நாயுடு கூறியதாவது, “இந்த உலகின் மிகப்பெரிய ஜனநாயகத்தை நாம் கொண்டிருக்கிறோம். அதேபோல் நமது நாகரிகமும் மிகப் பழமையானது. எனவே அனைத்து பிரச்சினைகளையும் பேச்சுவார்த்தை மூலம் தீர்த்துக் கொள்வதில் நம்பிக்கை கொண்டு இருக்கிறோம். ஆனால் எல்லையில் சதித்திட்டம் மற்றும் தீய நோக்கத்துடன் செயல்பட்டால் அவர்களுக்கு (பாகிஸ்தான்) வீர தீரமிக்க நமது இராணுவ வீரர்கள் தகுந்த பாடம் கற்பிப்பார்கள்.

எல்லை பகுதியில் ஸ்திரத்தன்மையற்ற நிலையை ஏற்படுத்தவும் பதற்றத்தை உருவாக்கவும் தொடர்ந்து முயற்சிகள் நடக்கிறது. தூதரக ரீதியாக தீர்வு காணப்படவேண்டிய பிரச்சினைகள் கூட தவறாக கையாளப்படுகிறது. இதுபோன்ற முயற்சிகள் இன்னும் அதிகளவில் நடந்தாலும் ஆச்சரியப்படுவதற்கு இல்லை.

நமது நாடு அமைதியை விரும்பும் நாடாகும். அமைதி என்பது நமது இரத்தத்தில் கலந்து ஓடுகிறது. இதை சீர்குலைக்க முயற்சிக்கும்போது, அதை நமது இராணுவ வீரர்கள் தகுந்த பதிலடி கொடுத்து முறியடிப்பார்கள். இதைத்தான் கார்கில் போரில் நிரூபித்து காட்டினோம். நமது இராணுவ வீரர்களிடம் சாதகமான பல்வேறு அம்சங்கள் உள்ளன. அவர்கள் 125 கோடி மக்களின் ஆதரவுடன் எதிரிகளுக்கு பாடம் புகட்டுவார்கள்.

1971ஆம் ஆண்டு நடந்த போரில் நமது வீரர்கள் திறமையுடன் போரிட்டு எதிரியின் முயற்சிகளை முறியடித்து நாட்டுக்கு புகழ் சேர்த்தனர் என்பது அவர்களுக்கு (பாகிஸ்தான்) நினைவில் இருக்கும்.” என்றுள்ளார்.

Followers